每擺若是到年底，總是會收著真多紅帖子，不管是台灣禮俗也好，是中國習慣也無要緊，攏是講有錢沒錢娶某過年，到甲年底娶某的，嫁尪的特別多，不過，若是一個吃頭路人，卡著年底這關，實在是真歹過。有一年年底，我有認真斟足甲計算，雄雄煞發現過年前的一個月內底，攏總收著各種各項的帖仔二十一張，亦有結婚的，亦有娶媳婦、嫁查某子的，亦有嫁尪娶某的，亦有做生日過大壽的，亦有歹事白帖仔。
一張帖仔包一千著好，彼個月尚無包二萬外元去，這若吃頭路人，一個月總趁是三、二萬元，一個月的薪水剛好乾乾，厝內的家用煞不知要按怎者好。
咱的台灣俗語有一句話，治咧形容這款情形，「人情世事陪透透，無鼎甲無灶」，想起來嘛是有影，一個吃頭路人，若是二千一張帖子，每一位攏去送禮，攏去交陪，無不著，人情世事是攏愛纏對相陪，不過，厝內的日子著真歹過。
有一割卡開化的人，遇著這款代誌，將這句俗語甲改做「人情世事陪透透，免鼎甲免灶」，意思是治咧講笑講送禮吃桌，厝內就不免設伙食，不管按怎講，人情世事若要陪甲到，無鼎甲無灶，今日仔介紹這句台語俗語！（請以台語讀）